Tuurebricht <Graui Stöckli>

Früech am Morge u überpünktlech träffe di zwöi Outo vou mit ungernähmigsluschtige Tüüreler ir Obermad bi Gadmen y. D Fääli si gleitig ufzoge u d‘Harschyse montiert. Bime ruppige Aschtig dür d’Erlestude u Tannli oberhaub vor Chalberweid loufe dMotorli scho grad einisch uf Hochtuure , wiu d‘Schi sogar müesse treit wärde. Aber oberhaub vo der Schteilstuefe tüe sech lieblechi Häng uf u lö scho chli e Vorahnig ufs Abefahre lo ufcho.

Aber nacheme Teehaut ufeme äxtra zu däm Zwäck dert plazierte Stei zieht sech de dä Ufschtig doch no chli use. Di füfzähhundert Meter Höchi müesse haut de scho no chli verdienet si. Am Chessu vom Gadelouisee vrby geits am Gipfu zue.

Aui Müehi isch gleitig vergässe dert obe: absolut windstiu und ä wunderbare Usblick zringsetum: Im Norde dominant dr Titlis, im Oschte sSuschtehorn, im Süde sTriftgebiet u gäge Weschte dr Töifblick bis a Brienzersee. Mir gniesse’s.

Äs git ä schtotzige Ystieg i di Troumhäng vor Gadelouiegg. Bi dr hüttige Lawinesituazion isch’s ungfährlech. Und jez geit’s los; fasch ändlos bis’s i de Oberschänkle fot a fo brönne. Es isch äbe doch nid fäderliechte Pulver, mi muess ihm scho chli Ehr atue. Mi ghört dr eint oder anger Jutzer mit Echo i de Flüehne. Ender scho abentürlech isch de d‘Abfahrt i de Stude. Aber ou das geit guet. Dunge ufem Parkplatz luege mir unglöibig zrugg ueche a di Häng wyt-wyt obe. Chuum zum Gloube, das mir vo dert obe chöme!

Mir synis einig: De Pegu, dä versteit öppis vo Tuurewahl u vom Wätter. Danke Pegu !

Röbu